Sa festa prus manna de Setzu est “Sa festa ‘e Fra Ignaziu”, intitulada a Sant’Ignàtziu de Làconi.
Sa festa si fait de su 29 a su 31 de Austu.
Su 29 e su 30 nci funt siat festamentus relijosus siat tzivilis, cun processionis e atras festas in sa pranza printzipalis.
Su 31, a su kitzi faci a ora de is ses, si fait “sa circa” in onori de “Fra Ignatziu questuanti”: totus is òminis de Setzu, acumpanjaus de unu sonadori de launeddas e de unu de fisarmòniga, passant de domu in domu cantendi e sonendi po circai cosa de papai po “sa merenda”.
In donnya domu si firmant “una scapededda”, po cincu o dexi minutus: faint unu cuaddeddu de ballu sardu, cun is meris de domu a su sonu de sa mùsiga, is balladoris si setzint unu pagu, sa meri de domu cumbidat e agoa acabant su giru de sa bidda, po arregolli is benis ki sa genti bolit donai.
Custu est unu arrogu de sa cantzoni ki is circadoris cantant a s’intrada de donnya domu : “Prega, prega, pòpulu meu, Fra Ignàtziu s’abisitat”.
Finida sa circa, su ki est stètiu arregortu est portau in pratza e postu in una mesa; candu bessit sa processioni de crèsia, faci a ora de is undici, si firmat ananti de sa mesa, su predi benedixit is benis e fait una predica po is jòvunus A su merì, totu sa popolatzioni pigat parti a su murtzu, “sa merenda de Fra Ignatziu”. In su jassu, podeis biri custa is fotografias de custa festa.
S’atra festa manna de Setzu est siguramenti sa de “Sa frègua e su pani indorau”, ki dd’afestant su 19 de Austu.
In custa ocasionis, is fèminas de Setzu amostant cumenti si fait su frègua, in una domu campidanesa ki su comunu at torrau a fai a nou, e ki est aintru de sa bidda, in bia Casteddu.
Po dda biri, podeis andai me in sa parti de custu jassu innui nci funt is fotografias de Setzu.
Ananti de una biga de genti ki aproliat po biri custu esempru de traballu antigu e pretziosu, ki est sempri prus difìtzili de biri, is fèminas traballant s’àcua e sa farra.
A sa genti ki aproliat s’amostant puru is ainas po sedatzai, duncas is sedatzus, is cilirus, is ainas po su forru.
|
