Introsidura
Su sardu campidanesu est una lìngua ki cuntennit prus bariedadis, ki mudant po calincunu elementu, ma funt sìmbilis e is fueddantis si cumprendint a pari.
Naraus ca is diferèntzias funt sceti de pronùntzia, poita ca in donnya logu, e fintzas in donnya bidda, nc’at una manera diferenti de nai sa stessa cosa.
Est beni a sarbai is bariedadis localis, po piticas ki siant, ca funt unu beni po sa comunidadi e po totu sa Sardinnya e faint parti de sa stòria nosta, perou, est beni puru a si comprendi a pari e a sciri ca seus kistionendi sa stessa lìngua e is diferentzias non depint essi strobu a fai una lìngua sarda cumprèndia de totus.
Sa fueddada satzesa:
Setzu est unu comunu de sa Marmidda, duncas si kistionat su campidanesu in sa suta-bariedadi de scurigadroxu, est a nai cussa bariedadi de campidanesu ki est kistionada in totu su Campidanu de sa Marmidda e de Casteddu, po arribai a Nordu fintzas a Oristanis e fintzas a Siliqua e Fluminimaggiore. Bireus is diferentzias de custa fueddada:
- In su fueddu, a bortas is consonus mudant logu, est a nai ki unu pigat su postu de s’atru. Es. Cerbeddu si narat çrobeddu, sorga si narat sroga, cunserva si narat cunsreva (o cunsreba);
- Sa –L-, intru de duas boxalis bessit –B-. Es. Sa mela si narat Sa meba, Su soli si narat Su sobi;
- Su cunsonu –n- , a bortas, non si pronùntziat a intru de duas boxalis, e bessit unu sonu nasali. Es. Manu si narat Mãu, Luna si narat lũa, cani si narat cãni.
- Candu nc’at prus de unu cunsonu, massimamente –r- innanti a-t-, sa –r- non si pronùntziat. Es. Mortu si narat motu, parti si narat pati, borta si narat bota, ùrtimu si narat ùtimu.
- A bortas su cunsonu, a su cumentzu de su fueddu, sparessit. Es. Bosatrus narant ‘osatrus.
- A bortas, is satzesus si nci papant sonus ki funt aintru de su fueddu, boxali o cunsonu. Es. Su fueddu Mèrcuris si narat mrecuis, ca est arruta sa segunda –r- e su cumentzu Mer- bessit Mre-.
- Calincuna boxali dda pronùntziant serrada, duncas E/A passat a O. es. Brebei si narat Brobei, Apribi ddu narant Opribi.
- Su passau simpli de su verbu Essi est: Fui, Fusti, Fut, -fuaus, Fuais, Fuant.
- Su verbu Tenni pigat su postu de AI candu custu bolit nai “essi meri”, “tenni in poderi”, est a nai candu est sighiu de unu nòmini.
|
